Ross and Cromarty (skotsk-gælisk ) er eit område i Highlands and Islands i Skottland. Det hadde status som grevskap (county) frå 1889 til 1975. I dag er det eit lieutenancy area og blir nytta som statistisk område og i samband med folkeregistrering og tinglysing.
Fastlandsdelen av grevskapet hadde kyst mot Moray Firth i aust og The Minch i vest. Mykje av fastlandet er grisgrendt, og omfattar delar av fjella i Northwest Highlands. Dei viktigaste byane på fastlandet er alle på austkysten, mellom anna hovudbyen Dingwall, Alness, Cromarty, Fortrose, Invergordon og Tain. Den største busetnaden på vestkysten var landsbyen Ullapool. Fylket dekka også delar av Dei ytre Hebridane, mellom anna Isle of Lewis med byen Stornoway. Nabogrevskapa var Sutherland i nord og Inverness-shire i sør.
Historie Fastlandsdelen av Ross and Cromarty svarer grovt sett til den tidlegare provinsen Ross. Den skotske krona gjorde krav på dette området frå 1098, etter at det tidlegare hadde vore under norsk overherredøme. Då det blei del av Skottland blei det del av Inverness-shire.
Ross and Cromarty county blei skapt gjennom Local Government (Scotland) Act 1889 av dei to tidlegare fylka Ross-shire og Cromartyshire. Den siste lordløytnanten av Ross-shire, Kenneth Smith Mackenzie, blei den fyrste lordløytnanten av Ross and Cromarty.
Kjelder
Kategori:Statthaldarskap i Skottland Kategori:Tradisjonelle grevskap i Skottland Kategori:Highland